ചാള്‍സ് & ഹന്ന

ഹിമകണങ്ങളുടെ അശ്ലേഷണത്തിലമർന്നിരുന്ന്, അവയെ യാത്രയാക്കുവാൻ മടികാണിക്കുന്ന വൻമരങ്ങളോട്‌, പുത്ത്‌ തളിർത്ത്‌ ചുറ്റം സുഗന്ദം പരത്തി, ലക്ഷണമൊത്ത കാമുകന്മാരെ ആകർഷിക്കുവാൻ, വെമ്പലോടെ കാത്തിരിക്കുന്ന യുവ മരങ്ങൾക്ക്‌ അസൂയ തോന്നുന്ന എപ്രിൽ മാസത്തിലെ ദിനാരാത്രങ്ങൾ. ഡ്യൂട്ടി ടൈം 5-6 മണിക്കൂർ മാത്രമാക്കി ചുരുക്കി, വല്ലപ്പോഴും തലകാണിച്ച്‌ മടങ്ങുന്ന സൂര്യൻ. അങ്ങിനെയുള്ള എപ്രിൽ മാസത്തിന്റെ മദ്ധ്യത്തിൽ, അതായത്‌ എപ്രിൽ 15-1889.

വണ്ടറടിച്ച്‌ നടക്കുന്ന ലണ്ടൻ നഗരത്തിന്റെ തെരുവുകളിലൂടെ, ചാൾസ്‌ പതിവ്‌ പോലെ തന്റെ പതിവ്‌ ക്വാട്ടയും വാങ്ങി മടങ്ങുന്ന സമയം. 4-5 കുപ്പി അന്തികള്ള്‌ അകത്താക്കിയത്‌, ഇനി എങ്ങിനെ പുറത്താക്കാം എന്ന സ്ഥിരം പരീക്ഷണം വിജയിക്കാത്തതിലുള്ള നിരാശയോടെ, വഴിയെ പോകുന്നവനോട്‌, "ഡാ ഗെഡി, എന്നെ ഒന്ന് വീട്ടിലാക്കീട്ട്‌ പോട" എന്നാദ്യവും, വല്ലതും കിട്ടിയാൽ "മോനെ, ചേട്ടനെ വീട്‌ കണ്ട്‌പിടിക്കാൻ ഒന്ന് സഹായിക്കെട" എന്ന് പിന്നിടും ചോദിച്ച്‌കൊണ്ട്‌, തന്റെ കപ്പാസിറ്റിക്കനുസരിച്ച്‌, മാക്സിമം ദൂരം ഒറ്റക്ക്‌ കവർ ചെയ്ത്‌, ആരെങ്കിലും ഒന്ന് തൊട്ടിരുന്നെങ്കിൽ, താഴെ വീഴാമായിരുന്നു എന്ന പരുവത്തിൽ നിൽക്കുന്ന വഴിവിളക്കിന്റെ തൂണും ചാരി നിന്നു.

ചാൾസിന്റെ സപ്പോർട്ട്‌ കിട്ടിയപ്പോൾ, 45ഡിഗ്രിയിൽ റോഡിലേക്ക്‌ നോക്കി നിന്ന വഴിവിളക്ക്‌, പോസിഷൻ മാറ്റി, അപ്പുറത്തെ അന്നാമ്മചേട്ടത്തിയുടെ അടുക്കളയിലേക്ക്‌ അലൈൻ ചെയ്തു നിന്നു. വഴിവിളക്ക്‌ വീഴാതിരിക്കാൻ ചാൾസും, ചാൾസ്‌ വീഴാതിരിക്കാൻ വഴിവിളക്കും പരമാവധി മൽസരിച്ച്‌ ശ്രമിച്ചു.

ആരോടെങ്കിലും രണ്ട്‌ കിക്ക്‌ കിട്ടിയില്ലെങ്കിൽ കിക്കാവാതെ വീട്ടിൽപോകുവാൻ കഴിയില്ലെന്ന ചിന്തയിൽ ചാൾസ്‌ ദൂരേക്ക്‌ നോക്കി. ദൂരെ ഒരു പെൺകുട്ടി തുറന്ന്‌കിടക്കുന്ന ഓടകൾ മുഴുവൻ പരിശോധിച്ച്‌ ഓടിവരുന്നു. തന്നെയാണവൾ അന്വേഷിക്കുന്നതെന്ന് പാവം ചാൾസ്‌ അറിഞ്ഞില്ല.

"ഡാ, ഡാഷിന്റെ മോനെ, എന്റെ ഒന്ന് പിടിക്കെടാ" എന്ന് വളരെ സ്നേഹത്തോടെ പറഞ്ഞ ചാൾസിനോട്‌, "ചേട്ടാ, ഒന്നങ്കട്‌ നടക്ക്‌ വിട്ടീക്ക്‌ ട്ടാ, ചേട്ടത്തി പ്രസവിച്ചു. ആൺകുട്ടിയാണ്‌ട്ടാ" എന്ന് പറഞ്ഞതും, DSL കണക്ഷൻ പോയവർ യൂട്യൂബിൽ നോക്കുന്ന പോലെ, ചാൾസ്‌ വെറുതെ ആകാശത്തേക്ക്‌ നോക്കി.

ഹന്ന പ്രസവിച്ചു എന്ന സത്യം ഉൾക്കൊള്ളുവാനായി, അതിന്റെ ആഘോഷത്തിൽ, സ്വന്തം നെഞ്ചിനിട്ട്‌ നാലെണ്ണം ചാർത്തുവാനുള്ള ആവേശത്തിൽ, ചാൾസ്‌ കൈകൾ രണ്ടും മുകളിലേക്കുയർത്തിയതും, കാലുകളുടെ ബാലൻസ്‌ കണക്ഷൻ നഷ്ടപ്പെടുകയും, മൂക്കുംകുത്തി താഴെ വീഴുകയും ചെയ്തു. പിടിച്ചിട്ടും വല്ല്യകാര്യമോന്നുമില്ലെന്നറിയാവുന്ന പെൺകുട്ടി, പക്ഷെ, സ്ലീപ്‌ മോഡിൽ കിടക്കുന്ന ചാൾസിന്റെ അടുത്തെത്തിയതും, ചാൾസിന്റെ നിയന്ത്രണത്തിൽനിന്നും മോചിക്കപ്പെട്ട, വഴിവിളക്ക്‌, "മറ്റോന്നും തോന്നരുത്‌ ട്ടാ ചാൾസെ" എന്നുപറഞ്ഞ്‌, ചാൾസിന്റെ പുറത്ത്‌ തന്നെ കൃത്യമായിട്ടമർന്ന് വീണതും ഒരുമിച്ച്‌.

ചാൾസിന്റെ SMPS അടിച്ച്‌ പോയോ മതാവെ, എന്നുവിലപിച്ച്‌കൊണ്ട്‌, പെൺകുട്ടി അയാളുടെ അടുത്തെത്തിയതും, ചാൾസിന്റെ മെമ്മറി ഓണായി. "അപ്പോ ഞാൻ വീട്ടീന്ന് പോന്നിട്ട്‌, 8-10 മാസമായോ?. ഹന്ന ഇത്‌വരെ എന്നോടോന്നും പറഞ്ഞില്ലല്ലോ കർത്താവെ" എന്ന് വിലപിക്കുകയും എഴുന്നേൽക്കാൻ വിഫലശ്രമം നടത്തുകയും, എന്നാൽ, "ഞാൻ കുറച്ച്‌ നേരം കൂടി ഇവിടെ കിടക്കട്ട്ര" എന്ന ഭാവത്തിൽ കിടക്കുന്ന വഴിവിളക്കിനെ തള്ളിനിക്കൂവാൻ കഴിയാതെ വരികയും ചെയ്തു.

പെൺകുട്ടിയുടെ സഹായത്താൽ, എഴുന്നേറ്റ്‌ നിൽക്കുവാൻ കഴിയില്ലെങ്കിലും ചാൾസ്‌, വഴിവിളക്കിൽനിന്നും സ്വാതന്ത്രം പ്രഖ്യപിച്ചു.

--------------

പള്ളിക്കോ തനിക്കോ ഒന്നും കിട്ടില്ലെന്ന് ഉത്തമ ബോധ്യമുള്ള, വികാരിയായ അച്ഛന്റെ സൗകര്യം പ്രമാണിച്ച്‌, ചാൾസിന്റെയും ഹന്നയുടെയും മകന്റെ മാമോദിശ ചടങ്ങ്‌, അനന്തം, അക്ജ്ഞാതം പ്രോഗ്രാമിൽതന്നെ തുടർന്നു.

കുട്ടിയെ പേര്‌ ചോല്ലിവിളിക്കുവാൻ കുട്ടീടച്ഛനെയോ, പള്ളീലച്ഛനെയോ കാത്തിരുന്നാൽ, സ്കൂളിൽ ചേർക്കുന്ന സമയത്ത്‌ മാത്രമല്ല, പാസ്പോർട്ടെടുക്കുന്ന പ്രായത്തിലും മകന്‌ പേരുണ്ടാവില്ലെന്ന തിരിച്ചറിവിൽ, ആ മഹത്തായ കർമ്മം, ഹന്ന ഹിൽ എന്ന യുവതി, ഒറ്റക്ക്‌ നിർവ്വഹിച്ചു.

"ചാർളീ സ്പെൻസർ ചാപ്ലിൻ"

നടക്കുവാൻ പഠിക്കുന്നതിന്‌ മുൻപെ നൃത്തം പഠിച്ച, സംസാരിക്കുവാൻ കഴിയുന്നതിന്‌ മുൻപെ പാട്ട്‌ പാടുവാൻ പഠിച്ച, ലോകത്തെ മുഴുവൻ ചിരിപ്പിച്ച, ചാർളി എന്ന കൊച്ചു ബാലന്റെ ജീവിതകഥ തുടരുകയാണ്‌.